「純港產法式旋轉型生活潮流雜誌《100毛》正式向政府申請免費電視牌照」可以由真·方健儀把口中讀出黎，嗰一刻我知道毛孩要爆了！
跟住落黎，我將會以非技術 同埋 純技術 嘅角度去解構一下毛記電視網站嘅鍊成動機以及鍊成方法。
文章將會分成兩部份
毛記電視網站是怎樣鍊成的？| Gap撈Tech (技術成份比較重)
爆了
說到爆了，腦海湧現嘅係古巨基首<爆了>
別講笑 憤怒爆開了 讓我爆開了 火花正燃燒
呢一首流行曲當年冇遇上怒火中燒嘅香港人，可以話係生不逢時。但今年面對樓價升到上歷史高位、最近嘅特首答問大會完美演示「答咗等如無答」再加上港產神劇大時代掟野落街嘅一幕，〈爆了〉歌詞完全符合近期局勢，點樣Match法就要自己領會下喇！
「爆」者要具備潛力，「爆發」亦要有誘因。100毛的爆發並不是空穴來風。
獨有的抽水式幽默
荒謬嘅制度、言論、對話每日都會出現，總有部份人會對呢啲荒謬不聞不問，完美演譯「事不關己，己不勞心」。相反，毛孩就喺「事事關心，事事花生」，將每日身邊所發生嘅荒謬加以演譯成了抽水式幽點去嘲諷荒謬製造者。
講咗咁耐，其實而家呢個社會究竟有幾荒謬？立即睇睇！
一個香港特首可以無賴到一個咩嘅地步？
「我無講過話我無僭建」
打工仔如何唔洗做又有糧出，其實有條公式嘅
成為警察 + 拉示威者到暗角 + 無意被記者發現 + 停職留薪
= 唔洗做有糧出
荒謬多如繁星，抽水式幽默亦應此而生。
其實如果啲現役高官、議員、鐵飯碗有番少少慧根、社會道德、職業操守，香港啲荒謬根本唔會存在，甚至可以話100毛都唔會存在，想毀減100毛嘅當權者，你地識做喇！
最近，100毛嘅抽水式幽默由一行行的文字、一幅幅的圖片轉變成一段段的影片。
更上一層樓的渠道
以往廢青只可以購買《純港產法式旋轉型生活潮流雜誌》先可以欣賞到嘅妙語連珠，而家多咗一個免費渠道－毛記電視網站去欣賞呢種「偽術」！相信有更多廢青可以受惠，更加令傳閱分享亦變得更容易！
「飲水思源」喺中國傳統美德；「抽水思源」亦係香港廢青傳統美德，而家我奉勸廢青們睇毛記電視記得要「抽水思源」，要知抽水出處以及將出處分享比身邊啲「十指不沾毛之水」嘅廢青們！一齊減低香港嘅相對濕度！
可能有人問，抽水還抽水，點解唔直接掟片上Facebook或者Youtube抽水？唔洗洗錢架喎！點解係都要搞壇網站出黎呢？
答案好簡單，要達至收支平衡。
建站成本
究竟2015年要自己搞個網站洗幾多錢？等我粗略簡介一下，純粹普普通通Host一個小型網站，以我呢個Blog為例，採用比較新嘅技術(Nodejs + Nginx)，租個 40HKD/月 Server，經過實測呢個組合大約可以處理到600個Concurrent Connection (簡單啲黎講最高峰每秒可以處理到600人同一時間上呢一個網站，再生活化啲講，即係有啲網站同時去報名，報到一半就打柴就係因為伺服器處理Concurrent Connection嘅能力太低)，600對一個Blog黎講已經十分夠用！
好可惜香港太細太唔重視IT，一間公司如果用新技術會好難請到合適人選，所以大多數公司起網站多數用最「傳統」嘅技術，毛記亦受呢一個限制，舊野嘅效能當然相差一大截啦，唯有租貴啲租多啲伺服器提升番個效能。不過太過Tech嘅野留番下一篇文再講，集中番去毛記電視網站先。
多謝你地睇完我嘅－純Show Off非牟利植入式廣告介紹呢個Blog；講番毛記個網，Host 一個毛記電視網站要洗幾多錢？唔計人工，經過我粗略計算，估計淨計硬件每個月固定開支大約要二至三千蚊左右*。如果你係毛孩、Tech人、想睇下自己識幾多Web野或者好學嘅你，想知道條數點計，一陣記得睇埋下一篇《毛記電視網站是怎樣鍊成的？》。
都未計開發者人工，淨網站一個月已經要洗二、三千蚊*！點為到皮？
*數字為筆者揣測，未向有關公司核實，與實際數字可能有出入，不能作準。網站就是要營利
一講到營利，你可能曾經會有一刻覺得一個網站要營利喺一件好市懀嘅事，其實真·市懀係有一個國際標準。一啲網站，經典例子就喺BuzzHand，網站滿佈廣告LOAD得慢之餘仲要成日彈野出黎搏你唔小心禁到，忽略用家體驗，甚至為左提升網站流量緃容偷文、偷圖、偷片、做假新聞、震驚十三億人的標題黨、假科技、假醫學常識⋯⋯呢啲先係真·市懀！簡直不可饒恕！
相反，如果一個網站依靠獨家有營養嘅內容再從中獲利，絕對唔喺市懀！試想下有營養嘅文章絕對唔會從天而降，全部都係作者經過思量、資料搜集、分析、鋪排，然後逐、隻、逐、隻、字打出黎，就好似我而家打、緊、呢、一、篇、文、章、咁。同樣地，毛記電視嘅影片都係佢地製作組一分一秒咁度、拍、剪出黎！
我個人覺得毛記電視最吸引嘅就係《六點半左右新聞報導》
一段三分鐘嘅報導由草稿直到可以搬上銀幕要搞幾耐，洗幾多錢？以一個月十幾條計，台前、幕後、編採、導演、器材、拍攝、外景、收音、補鏡、燈光、道具、臨記、場地、特效、配音、抽水、剪接、即時抽水欄、字幕、派膠、較對缺一不可，淨計人力物力一個月花費至少十萬以上。如果好商業化咁諗，將毛記電視視為一個獨立的Business Unit，每月平均花費六位數字，但要達至收支平衡殊不簡單，不能依賴Facebook或者Youtube呢類頻道發放佢地嘅「劣質」制作，只有自建網站，利用人流吸引其它廣告客戶落廣告先可以搵番夠本繼續營運！
粗製濫造等於自掘墳墓，保持獨有風格、新鮮感才是長勝關鍵！
新鮮客串
短短開台兩星期，睇過毛記電視嘅相信都知道邊啲人客串過毛記電視架喇，對於啲未睇過嘅我就略略簡介客串過啲咩人(點擊可以進入毛記電視)：
有時睇得多《讀者文摘》，間唔中睇下《龍虎門》其實都唔錯！毛記電視就係我嘅龍虎門，大家可以拭目以待不同嘅新鮮客串。
希望毛記電視能夠保持一貫水準，繼續佢地嘅「粗製濫造」！
下一章
要成就大業不能單憑胸有一腔熱血或者靈活的市場觸覺，高效具彈性的技術是不可或缺的。
下一章，會以技術角度解構毛記網站：
毛記電視網站是怎樣鍊成的？| Gap撈Tech
如果你唔算係Tech人，但想更多人了解100毛、毛記電視，可以考慮分享此分章比更多人。
